تعالي نعلمك كيف تجعلي طفلك ذكي ومؤدب..؟؟

[ام عبد المولى]

رجعت لكم بموضوع جديد .. اتمنى تستفيدوا منه

عندي نقاط مهمة لأطفالك تميزهم عن غيرهم

ذكاء.. وأدب.. وعقل..وحسن تصرف

لازم كل ام تحط ببالها انه اطفالها يختلفوا عن

بعض

والذكية اللي تعامل طفلها بأسلوب يناسب

شخصيته ... يعني الاول مو زي الثاني والثاني

مو زي الثالث... واحد يجيكي عنيد والثاني

ضعيف الشخصية والثالث مهضوم حقة وزي

كذا ... احنا الامهات جيل متفتح ومتعلم نختلف

عن امهاتنا السابقات... يعني الام زماااااااااان

كانت تربي عيالها تربية وحدة بغض النظر عن

الفروق الفردية بين اولادها والسبب راجع الى

عدم وجود تعليم كافي سابقا وعدم وجود وسائل

الاعلام والى ضغوط الحياة سابقا وظروف

المعيشة ...وماقصروا معانا أدوا حق الله فينا ..

وربي اعطاهم على نيتهم


يعني احنا امهات واعيين وفاهمين ومتعلمين ...

لا تجي وحدة وتقول نربي عيالنا زي ما ربونا

اهالينا ؟؟ انا معاكي انه في نقاط مشتركة بين

تربية زماااان وتربيتنا حاليا ... لكن لازم يكون

عندنا اساسيات تعاملي فيها طفلك ماهي موجودة

زماااااان او موجودة بس عند فئة قليلة... وراح

اذكرها لكم ...


نجي للمفيد


النظام


- مثل ما قلت لكم كل طفل له اسلوب خااااص


لتربيته نظرا للفروق الفردية والعقلية للطفل


ولكن يجتمعوا في نقاط مشتركة ... مثال:


اطفالك كلهم علميهم على النظااااام بغض


النظر عن اختلاف شخصياتهم ... اهم شيء


النظاااااااااااااااااااااااااا ام


طفل بدون نظام ... بيكون فوضوي


ومزعج ... عوديهم من صغرهم .. واللي ما


لحقت على اطفالها تعلمهم .. مو مشكلة تبدا


من دحين وتقول لهم انا بحط لكم جدول


تمشوا عليه ... ولازم تخليهم يوافقوا على


الجدول يعني تسمعي موافقتهم باذنك ...


عشان تحمليهم مسؤلية عدم التزامهم


بالنظام .. ومو لازم تدققي بكل شيء وتخلي


حياتهم كلها نظام في نظام ... كأنكم في


تدريب عسكري ... لا لا حاولي تنظميهم


في الاشياء الاساسية والباقي اتجاهلي او لا


تدققي عشان لا يملوا اطفالك ...



نظمي نومهم ... اعطيهم ساعة محددة ..


حتى لو في الاجازات مثلا اختاري لين متى


يسهروا ... اعطيهم وقت كافي للسهر ..


على حسب عائلتك.. يعني مو معقول اولاد


عمهم في نفس العمارة بيسهروا للصبح


واولادك يناموا 9 بالليل ... لا لا اختاري


وقت معقول للسهر يعني لا تفريط ولا افراط


وانا اشوف انه الساعة 2 بالليل وقت


مناسب للاجازات ... واعطيهم وقت يجلسوا


على النت .. حددي بالساعات وخذي منهم


موافقة شفوية .. زي ماقلت لكم عشان


يتحملوا مسؤلية عدم التزامهم ... حددي


وقت للفسحة يشتروا تسالي مثلا العصر ..


ومرة وحدة يشتروا باليوم ... مثلا اللي


ساكنة بالعماااارة مع اهل زوجها ... حددي


لهم وقت يروحوا لجدتهم مثلا العصر


للمغرب .. واذا عندهم ضيوف الوضع


يختلف ... وكل ما كان الطفل كبير كل ما


استوعب النظام اكثر .. انا بناتي 9 و 8


سنوات ملتزمين بالنظام الى حد ما


لكن ولدي 4 سنوااااات مو كثير ملتزم ...


بس يحاول يقلد اخواته ... وطبعا انتي ام


واختاري النظام اللي تشوفيه مناسب


لأولادك .. والله بيكون اولادك منظمين


ويتعلموا الصبر ... ويحسوا بطعم الشيء


اذا اخذوة بعد انتظار ... واهم شيء يبعدوا


عن الفوضى .. لأنه الفوضى بيعكس على


تربيتك انتي ... لأنه الطفل مراية امه مو


مراية ابوه ... ولا تنسي تتكلمي معاه عن


اهمية النظام


والهدف منه ؟؟ لأنه طفلك بيتضايق ويقول


ليش فلانة امها ما تمنعها .. ووو.. الخ


انا بناتي كانوا يحبوا الحوش مرررة


ويجتمعوا مع بنات عمهم دايم ... وتعبت


معاهم بموضوع الحوش ... حتى اقنعتهم ..


انه الحوش ما يربي الطفل ... ما يخليه


مرتب .. ما يعلمة الادب والنظام ... ودايم


اكررها حتى اقتنعوا


وصرت اخليهم في الاسبوع مرة يلعبوا وفي


العصر ... >>>> تكره الحوش






لا تخلي كل العائلة تربي طفلك ...


اسوأ شيء انه الوحدة لما تكون عايشة مع


اهل زوجها بنفس العمارة او قريبة منهم ...


مو عشان شيء ... حتى لو كانوا اهل


زوجك طيبين .. على عيني وراسي ... لكن


التدخلااااات بتربية طفلك تشتت ذهنة ..


وتخليه مهزوز وغير مستقر ... كل من كان


يربي طفلك ... اساس مدرسة طفلك من


بيتك انتي .. فهميه وعلمية انه انتي اللي


يسمع كلامك وانه الطفل يسمع كلام امه


مهما كان ... وحتى امك كمان واخواتك


برضوا لا يؤثروا على تربية ولدك... انا


مرة قلت لأختي الكبيرة .. اذا عندك


ملاحظات قوليها لي انا... وانا بطريقتي


اعلمة واوصلها له <اختي تمون علي يعني


ما تزعل >... اما الاشياء العادية زي مثلا


لا تكبي العصير... لا تضربي فلانة ... لا


تطيحي ... طبعا اشياء عادية جدا جدا وما


نختلف فيها ابد... لكن مثلا تجي اختي


وتحدد كم ساعة يجلس طفلي على النت ...


احسها شويه صعبة ... او متى ينام ؟؟؟


يعني انا معطيته نظام معين ما احب احد


يجي يلخبطه عليه .. عشان هو لا يتشتت


وما يدري من الصح ؟



واذا ام زوجك اتدخلت بنوم طفلك ... مثلا


وقت الدراسة تبغيه ينام 8 وام زوجك قالت


لا خليه عندي لين 10 .... لا تردي عليها


وتقولي والله انا معلمته النظام ويمشي عليه


وووو الخ.... ترى بيزعلوا منك .. كانك


تتهميهم انهم فوضوين ومو مرتبين ولا


تنسي انك تتعاملي مع اهل زوج ... يعني


اغلبهم يفهموا سلوكك خطأ ... ردي عليها


بطريقة <دبلوماسية> قولي لها ... عشان


بصحية الصبح بدري اراجع له عنده


اختبار ... او لانه ما نام العصر ... او أي


طريقة تخرجك من الموضوع بدون ما


يزعلوا ...






اهتمي بشكل طفلك


- زي ما قلت لكم الطفل بيعكس شخصية


امه ... الطفل المبهذل .. شيء طبيعي الناس


بتنفر منه اصلا ما بيجذب احد ... والمرتب


ملفت للنظر وينم عن ذوقك انتي ونظافتك


انتي ... اكره ماعلي انك تلاقي الطفل وقت


العصر والمغرب جالس ببجامة الليل ولسى ما


غير ملابسه وامكن كمان ما بيغيره بينام فيه


لليوم الثاني .... لييييييييييييييييييش؟؟؟ بالله


فين عايشين احنا ؟؟؟ ايش دورك انتي كأم ؟؟


والله شيء يقهر ... لا واللي يقهر بزيادة


تلاقيهم يروحوا البقالة ببجايمهم وقمصانهم


<<< مفجوعة بقوووة



اشوفهم انا لما اخرج من بيتي بالسيارة ...


ولا يروحوا السوبر ماركت وباين لبسهم


مبهذل .. الله المستعااااان ... انا ما اشره


على الطفل ولا على ابوه ... اشره على الام


بصراحة... لبسي طفلك ورتبي شعره ... اذا


ما تحبي ... على الاقل الشغالة ترتبه ...


يعني ابد ابد مالك عذر ... اصلا كيف زوجك


يجي من العمل ولسى طفلك بلبس النوم مع


انه صاحي من بدري ؟؟؟ يعني الزوج


يشتري ويدفع ... وفي النهاية اللبس الحلو


برة البيت والمبهدل جوة البيت ؟؟؟ غريبة


بصراحة





عامليه اكبر من عمره



اذا تبغي طفلك يكون ذكي .... ما تتكلمي


معاه على قد سنه ؟؟ لا لا كلميه على انه


اكبر من سنه بسنتين او 3 سنوات ...


عشان يتوسع ادراكة ويستوعب قدر اكبر


من المعلوماااااات ... ويسبق جيله في


التحدث والطلاقة باللسان والمفردات


اللغوية ... ونمي ذكاءه عن طريق


المسابقات ... يعني اذا اتعلم الحروف


الهجائية من سن التمهيدي .. اعملي مسابقة


وقولي مثلا اعطيني حيوان بحرف العين ؟؟


او بلاد بحرف اللام؟؟ ترى والله هذي


المسابقة خارقة للذاكرة وتعلمة سرعة


التفكير ...



وبالنسبة للنقاااش وهذا اهم شيء ...


ناقشية على انه انسان كبير وفاهم


وواعي ... حتى يكون متحدث لبق ...


علميه اخر الاخباااااار وكرريها عليه حتى


ترسخ باذنه لانها معلومة جديدة بالنسبة


له ... اتذكر وحدة مصرية اعرفها عندها


بنت صغيرة كانت وقتها اولى ابتدائي وبنتي


ثالثة ابتدائي يعني الفرق بينهم سنتين ...


وسمعت بنت المصرية تكلم بنتي وتقول


انهم عينوا رئيس اوباما لامريكا وانه لونه


اسود ومن ذا الكلااااااام .... انا بصراحة ما


شاء الله تبارك الرحمن اتفاجات بصغر


عمرها وعندها هذي المعلومة وانا بنتي لما


دحين تحسب الملك فهد عايش ؟؟ مع اني


والله قلت لها انه مات وصار الملك دحين


اسمه عبدالله ... لكن مشكلتي ومشكلتكم انه


ما نكرر المعلومة عليهم اكثر من مرة ...


عشان كذا ما تثبت بسرعة ... وبصراحة


اتعلمت انه اكرر المعلومة عليهم اكثر من


مرة طالما انها تفيدهم وما تضرهم ....






اذا قلتي لا ... لازم تقنعيه ليش لا ؟؟؟



عارفين ايش مشكلتنا يا بنات .... انه


ماعندنا اسلوب الحوار والاقناع للطفل ....


نعامل اطفالنا على انهم بزارين ما


يفهموا ... لو كل ام اقنعت طفلها ليش لا ...


كان ولا طفل حاول يعيد الغلط ... اعرف


وحدة لبنانية مرة قالت ... اسلوبكم انتوا


يالسعوديين تقولوا لا بدون مبررات ...


طيب حاولوا تفهموهم ليش لا حتى يقتنع ...


يكبر الطفل وهو مو عارف ليش لا ... او


هو يستنتج مبررات بدون اهداااااف ... لو


كل ام تعامل طفلها على انه جيل المستقبل


وبكرة بيكون دكتور او مهندس والبنت نفس


الشيء ... كان ما استحقرنا طفولتهم ...


يقلك العلم بالصغر كالنقش بالحجر ...


اساس تربية الطفل بيكون من الصغر ....


عاملوهم على انهم كبااااار ... خذي


رايهم ... خذي ذوقهم .. حتى لو ما عجبك


ذوقه .. مو مشكلة المهم انك اعطيتيه قدره


وتقديرة





عامليه بأحتراااااام


وهذي نقطة لا يمكن انه نغفلها ... اذا


بتزرعي شيء في طفلك لازم انتي تبداي


معاه ... يعني تبغي طفلك يحترمك ويحترم


الناس ... بادري انتي بأحترامة.. لأنه فاقد


الشيء لا يعطيه... كيف تبغيه يحترمك وهو


ما جرب كيف بيكون الاحترام؟؟ وطرق


الاحتراااام كثيييييرة جدا


ومنها ... لو سمحت ... ممكن؟؟ ...


اتفضلي... شكرا.... من يوم عمره سنة


واتعاملي معاه بذا الاسلوووووب ... انتي


بتتعودي وهو بيتعود... وكمان ممكن تكوني


نقطة تحول للناس المحتكة فيهم .... يعني


بيشوفوا سلايفك وجيرانك كيف بتتعاملي مع


طفلك ويعملوا زيك ... يعني بتأثري في


البيئة المحيطة فيكي ... واكيد بيكون تأثير


ايجابي ... وهذا اللي نبغاه ...واهم شيء


عندنا احنا انه نغير العادات السيئة في


المجتمع لانه المجتمع بيؤثر على الفرد...


ولو كل وحدة حاولت تغير من نفسها ومن


الناس المحتكة فيهم ... كان قلت نسبة


التخلف في البلد بنسبة عاليه جدا ....





عاقبيه ولا تضربيه


العقاب سهل ... اذا عمل شيء غلط اول


شيء نبهيه انه غلط ولو كرره راح


تعاقبيه ... واذا عاد الغلط .. حطي كرسي


للعقااااااب على جنب وخليه يجلس عليه ..


واذا قام ارجعي رجعيه لنفس المكان بدون


صراخ او ضرب ... في البداية راح يقاوم


لانه مو متعود لكن بيتعووود مع الوقت ...


واالله يا بنات بتخف اغلاطه كثير احسن من


الضرب لانه الضرب يولد العناد والعصبية


وانا مجربتها شخصيا ... انا مو ضد


الضرب؟؟ لكن اخليه اخر وسيلة بعد


الانذارات والتحذيرات والعقاب ... واذا كان


طفلك كبير مابين ال 8 وال 11 سنة ... اذا


غلط لا تكلميه واحرميه من الاشياء اللي


يحبها .. والله بيمشي عدل ...





علميه ما ينقل اسراركم برة البيت ...


وهذي اهم نقطة .... وطبعا لازم تقنعيه


ليش ..ما ينقل اخباركم عشان يقتنع .... ؟؟


وفي كثير من امهات الزوج يحبوا يسألوا


عن اخباركم من اطفالكم على قول المثل


<اذا تبغى الاسرار اسأل الصغار>...


وبصراحة بيكون موقفك هنا محرج


بينهم ... بس حاولي تاخذي موقف من


الموضوع ... يعني لين متى تستفيد من


اولادك ...؟؟؟؟ وتعلمهم نقل الكلاااام ؟؟؟


وعلمي طفلك انه أي احد يسالك فين رحنا


وفين جينا ...؟؟ يقول اسألوا ماما ... لا


تعلميه يكذب ويقول ما ادري ... وهو اصلا


يدري ... او علميه يقول لهم ماما تخاصمني


تقول لا تنقل كلام لاحد <وبكذا تحرجي


الفضوليين > انا بصراحة بنتي الكبيرة 9


سنوات ما تقاوم جدتها يعني أي احد يسالها


ما تقدر تخبي كثير ومرة تعبت معاها...


فايش سويت انا ..؟؟؟ ريحت دماغي اذا


بنروح مكان وسالتني فين يا ماما


رايحين ...؟؟ اقلها مفاجأة وبقول لكم في


السيارة ...؟؟ ومنها ارتحت من الفضولين


لانه ام زوجي تسال بنتي فين رايحين


وتقولها بنتي على طول <ماتعرف تخبي>..


لكن دحين خلاص اذا ام زوجي سألت بنتي


فين رايحين ؟؟ تقلها :ماما تقول مفاجأة


وبكذا انا ارتحت ... وحتى زوجي يزعل اذا


بنتي نقلت كلام لأمه ... لأنه يعرف امه


غيورة وما يبغى يحط نفسه في مشكلة


معاها ... مع انه امه دايم تخرج مع اولادها


الثانيين ...


... امكن البعض يشوف عاااادي انه ام


الزوج تسال فين رايحين وفين جاييين وهذا


راجع على حسب الام ..لكن البعض والله


غرضه مو كويس .. وغير كذا ما احب


بناتي يتعلموا ينشروا غسيلنا برة البيت ...


ومو مشكلة اذا رجعنا من مشورانا وسالت


بنتي وقالت لها على مشوارنا... المهم انه


ما احد عرف من البداية ... لو يعرفوا مني


انا عادي ... لكن من الاطفال احسها ماهي


حلوة واستغفال للأم والاب ... <<< متعقدة


من الاسئلة






علميه ينظف مكانه ويشيل اغراضه


حتى لو عندك شغالتين بالبيت ... لازم


اغراضه الشخصية يكون مسؤل عنها ..


يرتب سريره..يشيل صحنه وكاسته ... ما


يريمي ملابسه بل يطبقها ويرتبها... يرتب


جزمه


والباقي على الشغالة ... حلو انه طفلك


يكون مرتب ومنظم في بيتك وبيت


النااااس ... وطفلك على ماتعوديه... حتى


ما تتضايق الناس من فوضوته







شاركيه كلاااام الكبااااار ...


اذا وصل عمرها 8 سنوات او على حسب


العمر اللي تشوفيه منااااسب ... انا بالنسبة


لي 8 سنوااات مرة كويس ... المهم في هذا


السن علميها انه هي خلاص صارت طفلة


كبيرة لانه الاطفال نوعين اطفال صغار


واطفال كبار ... وانه ممكن تجلس معاكي


ومع ضيوفك .. لانه الطفل حتى يتعلم لازم


يحتك مع الاكبر منه ... ويستفيد منكم ... الا


في حالة وحدة .. وفهميها اذا كان موضوع


خاص للكبار .. نعتذر منك حتى نخلص


كلامنا ونناديكي لأنه الكبار عندهم مواضيع


خااااصة ... والحمد لله هذا اللي صاير


معاي انا وبناتي ... اخليهم يجلسوا مع


جيراني وصحباتي ... بس يكون موضوع


خاص .. استأذن منهم وهم على طول


يفهموا ... يعني متفقين على هذا الشيء...


واذا كان طفلك ولد طبعا ما ينفع يجلس


مع صحباتك في عمر 8 سنوات ...






عاملي طفلك كأنه ضيف مثلة مثل الضيوف


سبق وذكرت انه طفلك زي الضيف قدمي له


العصير مع الضيوف وباشري له بالحلاوة


او أي شيء تقدميه ... ما عدا القهوة


والشاي ... لا تعامليه انه طفل عامليه انه


كبير ... وله قدره وكيانه






امنعيه من الاشياء المعقولة .. مو كل شيء لا


امنعيه من الفوضى وحرصيه على الترتيب..


امنعيه من القهوة والشاي .. اكره ماعلي


اشوف ام تشرب طفلها قهوة وشاي وتقول


يبكي ما يرضى .. لا يا شيخة ؟؟ فين دورك


انتي كأم ؟؟ لو منعتيه من الصغر والله


يتعود ... الحمد لله اولادي ما يتجراو


يشربوا قدامي ... صح احيانا اشوفهم عند


ام زوجي يشربوا عندها .. بس اتغاضى لانه


اعرف انه تأثيرها قوي عليهم .. المهم


قدامي يحترموني وعارفين انه مو عاجبني




هذا الشيء ... وصحيح طفلي بالطريقة


هذي يتعلم النفاق ... قدامي بشيء ومن


ورايا شيء ثاني ... لكن العيب من أي احد


كبير يسيء الى تربية الطفل ... واكره


ماعلي انه يجي احد ويعاندني بتربية


اولااااادي


وبالاضاااافة الى البيبسي ... امنعيه منعا


باتا ... واذا سأل عن السبب قولي : حق


الكبااااااار


يعني صعب تقولي انه مضر ومافي فايدة


وانتي وزوجك تشربوا بيبسي ... صح؟؟


واللي حوالينه يشربوا بيبسي


واذا كبر لكل حااادث حديث....






لا تخوفيه بأبوه وتلغي دورك كأم :


والله كذا بتلغي شخصيتك وهيبتك وما يعمل


لك الف حساااااب ... وانا عارفة اكثر


الاطفاااااااااااااال ينحلوا قلب امهم ...


ويخافوا من نظرة عين ابوهم ... بس


برضوا لا تضعفي وتخوفيهم من ابوهم ...


لأنه انتي اللي بتتعبي معاهم بالبداية .. انتي


بتعيشي معاهم اكثر من ابوهم ... يعني


يقعدوا مجننينك لين يجي ابوهم ؟؟ مو


معقوووول يا امهااات ؟؟؟





طريقة اجدت نفعا مع الطفل العنيد ...


انا شخصيتي احب احترم الطفل واعامله انه


جيل المستقبل ... وانا هادئة جدا الى حد


ما ... لكن بس يجي طفلي يستفزني او


يعصبني وربي ما اشوف الطريق قداااااامي


خاصة اذا كان من النوع العنيد ... الاقي


العفاريت تنقز في وجهي .. وكل البرستيج


هذا يروح ... اتذكر امي الله يسعدها دايم


تقولي ادعي ربي انه يوسع صدرك على


الاطفاااااال ... >>> من كثر ما شافت


وعندي بنتي الاولى عنيدة وراسها ناشف


من يوم وهي مولودة وهي حاااارة ... المهم


اكون طول اليوم معاها زي الحلاوة... بس


تجي تقولي ما ابغى او بكيفي او حرة ....


يجن جنوني ... واوقف في وجهها


واخاصمها واقولها مابقي الا تعطيني


كف ... او اقلها :اتكلمي معايا بأدب قبل


تتلطشي... المهم صح انها تخاف من وقتها


وتسكت ... لكن هذي الطريقة والله تسبب


فجوة بيننا ... يعني انا ما ابغاها تخاف مني


قد ما ابغاها تحترمني ... وقعدت سنين


وسنين وانا اعاملها كذا اذا طولت


لسانها .... وزي ماقلت لكم تخاف من وقتها


لكن ممكن تحقد علي لأني اهنتها وجرحت


كبريائها .... لكن اتوصلت لحل سليم والله


يا بنااات اتغيرت بنتي كثير .... شكله ربي


استجاب دعوة امي والهمني طولة


البااااال .... المهم اذا طولت لسانها على ...


احرجيها بأسلوبك


قولي : كذا يا <....> تتكلمي مع ماما ؟؟؟


او هذا اسلوب حلو تتعاملي فيه مع ماما ...


قوليها بصوت واطيء وكله حنية .... والله


تلاقي عيونها تحوس يمين ويسااااار ....من


الاحرااااج ... يعني لا تربيها بعنف ...


ربيها بأسلوب هاديء .... والله حسيت بعد


اسلوبي هذا لغى الفجوة اللي بيننا وحسيتها


صارت تحترمني اكثر .... صح بيجي منها


اوقاااات ترفع صوتها علي او تستفزني ...


لكن برضوا عيدي نفس اسلوبك مرة


ومرتين وعشرة ... لأنه التربية جهاااااد


يعني ما بيتربوا من مرة ومرتين ؟؟؟ ما


انتي طيب طول السنة بترفعي صوتك عليها


جربي الصوت الواطيء.... امكن حركة


بسيطة تعمليها ... لكن تاثيرها كبير في


نفسها ... ويكفي انها تتعلم الهدوء وعدم


التوتر والعصبية ... والله جد جربوها


بتجيب نتيجة






علميهم انجليزي


اغلبكم مسجل اطفالة بمدارس حكومية ...


وعارفين الحكومي ما يعلم انجلش الا في


الصف السادس ... لا تنتظري المدرسة


علمي طفلك من عمره سنة او سنتين


الاشياء الاساسية ... لا تجي وحدة وتقول


انا ما اعرف انجليزي ... طيب ايش كنتي


تدرسي بالمتوسط والثانوي؟؟؟ لا تقولي ما


اعرف بالانجليزي ...اقل شيء الاسئلة


العامة ... والاساسية


مو لازم تعلمية كل الكتاب ... لكن في كلمات


لازم تقوليها وتخلطيها بالعربي ان امكن ...


وكل ما نسيتي ارجعي ذكري نفسك ...


وعيدي الجمل عليها ... هي اسئلة عادية


بس علميه عليها


ومنها ...


- What is your name?? ماهو اسمك ؟؟


- How are you??كيف حالك؟


- How old are you??كم عمرك؟


- Thank you- welcomeشكرا - مرحبا


- Can you give me ……ممكن تعطيني ....


- Sit down-stand upقف - اجلس


- Go to bedاذهب الى السرير


- Close- openاغلق - افتح


- Get upاستيقظ


- Don’t cryلا تبكي



يعني زي كذا اشياء اساسيه .... وبما انها اللغة

الانجليزية اللغه العالمية الاولى .. فخليها لغة

طفلك الثانية واقتدي بحديث الرسول صلى الله

عليه وسلم <من تعلم لغة قوم أمن مكرهم> ولا

تنسي انه طفلك بيكبر بكرة ويصير من جيل

المستقبل فلازم يكون تأسيسه صح


واذا رحتوا المطعم ويكون مطعم اجنبي .. صيني

او مكسيكي ... واغلب العاملين هناك يتحدثوا

الانجليزية


... كلفي طفلك يتكلم معاهم ... يعني زي انا بنتي

مرة كانت بتروح الحمام الله يكرمكم ... وقلت

لها قوليها بالانجليزي لانه الجرسون ما يفهم

عربي ... قالت ما اعرف ايش اقول له ....

علمتها تقول له
Excusme…. Where is the bathroom
??


كانت صعبة عليها واتلخبطت شوية.. لكن شوية

شوية وتصير الفاظها سهلة عليها ... يعني

استغلي المواقف عشان تعلميها انجليزي ....

وقولي لها ما يفهم عربي اذا تبغي شيء قوليه

بالانجلش ... ومرة كانت تبغى موية ... وطلبتني

قلت لها وحي للويتر ... واطلبيه مويه .. قالت

ايش اقوله ... علمتها تقول
Can you give me water
??


يعني مو تعلميهم فقط الكلام الجاف ... اعطيني

موية... او فين الحمام؟؟


لا لا علميهم يطلبوا الشيء بأحترام وذوق مثلا

من فضلك اين الحمام؟؟ او ممكن تعطيني موية

؟؟ لا تقولي صعبة عليهم ... هم صغاااااار

ويرسخ الشيء بذهنهم اسرع مننا .... بيغلطوا

مرة واثنين لكن هو طفل ومصيره يتعلم





اذا كان طفلك قليل ادب وما يحترمك ...


جربي تتكلمي معااااه بأدب واحترام ... الصراخ

لن يجدي نفعا ... خليكي هادئة عشان هو

يهدأ ... اذا هال عليكي بمجموعة اتهامات

مثلا : انتي ما تخرجيني ..؟؟ انتي ما تعطيني ؟؟

انتي ما تسويلي ؟؟


لا تدافعي عن نفسك وتقولي يا كذاب انا ما

اعطيك ؟؟


لا لا ... اهدأئ وسوي نفسك انه فعلا كلامه

صح <لا تقولي يتعود يغلط علي... لا تخافي>

وقولي له .. صح امكن انا ما عطيتك لانه ما كان

عندي شيء ... او ما سويت لأنه وقتي كان

ضيق ؟؟ راح تلاقيه كانه نار واطفيتيه بموية ...

لانه في هذا الوقت ما يبغى احد يدافع عن

نفسه ... هذي تراكمات على قلبه يتمنى احد

يؤيده ويقول انت على صح ... واذا قلتي انت

صح ... راح ينظف قلبه ... ويروح الحقد ...

ويرجع طبيعي .. ولا تنسي انه في النهاية

طفل ... يعني عقله صغير


جربوها انا جربتها مع بنتي العنيدة وجابت

نتيجة رووووعة ....





في نقطة مرة مهمة ... وخليتها لون مختلف

عشان مهم كل ام تعرفها ...


لازم تعرفي انه الطفل العصبي او العنيد هو اكثر

طفل يحتااااج لحنان وحب ..... عارفين ليش ؟؟؟

لأنه الطفل العنيد والعصبي استفزازي جدا مما

ينفر كل الناس من حوله حتى امه وابوه يتعبوا

معاه ... يعني تلاقي امه تنشغل بعيوبة وتشيل

وترفع من وراه وتخاصمه على اخطاءة ....

يعني ما يكون في وقت كافي الام تعطيه حب

وحنان ... يادوب تصلح اغلاطة ويرهق امه

ويتعبها .... فتلاقي الطفل في هذي الحالة فاقد

حب وحنان ... وهذا يؤثر على نفسة وممكن

تخليه عدواني او حساس جدا ... واحنا بنشوف

انه أي طفل شقي جدا تلاقي نظرة الحرمان

بعيونة او تلاقيه عدواني ... لأنه فاقد

العاطفة .... لكن جربي تعالجي عنادة بنقطة

ضعفة وهو <العاطفة> جربي تعوضيه وتحبية

وتحضنيه ... خليه يحس بالاماااااان اللي

فاقدة ...


راح تتغير نفسيته ... وشوية شوية يهدأ

الطفل ... ولازم الام في هذي الحالة تتحلى

بالصبر الشديد ...


عشان يتغير ...




وفي تربية ابناءكم احتسبوا الاجر من الله


ولا تنسوا <كلكم راعي وكلكم مسؤل عن

رعيته>

يتوجب عليك تسجيل الدخول او تسجيل لروئية الموضوع